Hæresis, obscoenos Christi velamine mores Pestiferumque tegens specioso nomine virus: Omnis in hanc fluxit scelerum contagio Lernam. Quale chaos rerum, tenebræ, confusio, bellum! Vox derilanti similis, mens (siqua) furenti; Et methodus, qualis connectit somnia; miror Si sanus, vigilem certe scripsisse negarim. Proponit, nec persequitur; per mille vagatur Lubricus ambages, nec se extricare laborat. Mille licet vicibus repetat sua, nausea donec Ingruat et patulæ arescant raucedine fauces, Nec meminisse sui valet, aut consistere secum, In cantu sibi perpetuo discordat eodem. Undique dicta rapit, compilat scrinia prædo Callidus, immutat fallax sua furta character, Deformat vultum larva celante priorem. Polluit historias, veteris dictamina famæ; Transponit loca, secernit vicina, remota, Germanis Indos, Rheno conjungit Hydaspem: Conturbat seriem fatorum, tempora rerum Invertit, seros proavis præferre nepotes Ausus, Alexandrum Cyro, Cyrumque Sesostri: Attexit nova, quæ nullus firmaverit author, Seria ridiculis, fucatis vera remiscet: Confundit brutis humana, et sacra profanis. Iste tamen liber, ut miracula vana, libido Lascivus, novitatis amor, metus, improbus error, Persuasere fidem falli proclivibus, alas Explicuit, variasque absurdo dogmate gentes Afflavit, comes armorum, quibus obruit orbem Turbinis instar atrox Nabathææ cultor arenæ. Vis illata duplex mundo; cervicibus arma Aptarunt juga, sed juga mentibus Alcoranus ; Quem velut æthereæ scintillam lucis Olympo Delapsam, veri canonem justique supremum Et solum, sub quo decidunt judice lites, Pensant facta, regunt mores, vitæque tenorem Componunt, miro Turcæ dignantur, honore; Descriptum pulchre limbo radiante coronant;
Solertes immensa reportant præmia scribæ : Mille coronatis totidem mendacia constant. Ast animo quisquis memori, cerebrique tabellis Mollibus insculpens defuncti verba prophetæ Respirare dedit, reverentia lautior illum Prosequitur, meruit suffimina, numinis instar Exigui colitur, decorat convivia præsens. Objectum non ablutis accedere plantis, Immunda tractare manu, contingere spurco Corpore, luminibusque sacrum inspectare volumen Haud bene purgatis, fuerit deflebile crimen. Lustralis tibi lympha deest, cum tollere librum Usus et officii ratio imperiosa requirit? Armatos adhibe digitos, et forcipe puro Suscipe, vel medii defensum tegmine panni. Væ tibi, ni caveas contra lustrare profano Podice, sacrificove opponere terga legenti. O curas secus impensas, a cortice sordes Externo prohibere, latentia stercora sensus Turpis, et impuri maculas celare recessus ; Ac faciem dictis, sed non advertere mentem. Hujus amor scripti non in se terminat, ultra Promovet affectus, et chartas consecrat omnes; Nosque reos peragunt infandi criminis ausos Natibus infestis sacram temerare papyrum, Religione sua inscribi (tum denique) dignam : Nec Venetis se perpendunt debere cloacis, Mirificum quæ nunc involvunt lintea vatem. Dotatur miris virtutibus illita libro Exceptis membrana notis; comitatur habentem Certa salus, fugiunt depulsa pericula; tutum Quis dubitet, tereti quicunque monilia collo Appendat sapiens chartacea, brachia sanctis Muniet armillis? quis tam temerarius illum Ut violet morbus, damnum manus inferat audax, Aut accedat alastor? prope non nimium præceps Pugnatur? quoties inimicos obtudit enses
Affixum signis carmen fatale, caducas
Restituitque acies, dubiamque arcessere palmam
Attractu valuit? panduntur vela, procella Ingruit, antennis circundata, chartula pontum Compescit, nubes abigit ventosque, serenum Allicit, in magico tanta est fiducia versu. Stylus Arabs libri, sensus sublimis, ut illis Esse solet nullus quibus est; evolvere cuncti Non intellecto quamvis sermone tenentur, Et legere ignari: studium persolvit ocellus, Mens vacat officio: quid enim, nescire profanam Excusare manum meruit, digitique recidet Ignavi curas? quo scilicet indice voces
Enumerant, literas, accentus, commata, versus ; Qualia, quæve legant cæci, quota nosse laborant; Mole fidem, non vi; numero, non pondere censent. Ne tamen ignoret penitus miserabile vulgus Quæ melius nescire foret, mysteria fidus Explicat interpres textumque enodat acerba Pensatus trutina, duroque examine notus. Nunc quæ depromunt ex illo dogmata fonte, Quos cudunt fidei articulos, exponere Musa Aspirante juvat. Seni numerantur in ore Communi celebres, primaque in classe locandi. Esse Deum, angelicas mentes, sacra biblia, vates, Judicium extremum, decreta bonique malique. De quibus uberior quæ sit sententia Turcis Dicam, nec posito deflectar ab ordine. Primo Est Deus, æternus, naturæ simplicis, unus Persona; similis, consortis, comparis expers; A nullo genitus, genitor nullius; origo Ipse sui; factor, custos, moderator eorum, Omnia quæ patulo mundus complectitur orbe. Transcendit sensum ipsius proportio, membri, Partis, divisionis inops, non competit illi Forma, nec effigies vivo simulanda colore.
Ante, simul, post res fuit, est, erit; haud manet usquam
Ille loci, nec abest; fixusqne per omnia currit.
Nec minor esse potest, nec major; commoda nulla,
Affectus, curas patitur: desciscere mundum
Finge, fides cesset, reverentia numinis omnis
Exulet, involvat sacrorum oblivio terras; Nec deserta suis fument altaria flammis; In cineres abeat cœlestis machina, priscum Terra chaos repetat, nihili redigantur in alvum Omnia, funestaque cadant absorpta ruina; Nec dives minus aut felix erit, haud premet illum Cura, vel afficiet dolor, aut urgebit egestas, Intra se plenum consummatumque, suisque Contentum saturumque bonis. Perlustrat aprico Lumine cuncta; cavernosis quæ clausa latebris, Quæ defuncta sua fugere evanida vita, Illaque, quæ nondum mundanæ conscia lucis, Imperfecta jacent dubiæ sub semine causæ ; Quo manifesta magis, præsentia, facta tuetur? Cognovit pater Oceanus quot lambit arenas, Quot numerat Ceres, ignavum quot grana papaver, Qui foliis census debetur, quique capillis. Hærentem scopulo polypum dijudicat, atræ Formicæque super nigrum vestigia saxum, Obscuros gressus sub opaca nocte tegentis: Percipit elisos submissa voce susurros, Atque verecundæ pressissima murmura linguæ. Quoque nihil fecit natura abstrusius, ille Intima rimatur taciti penetralia cordis.
Nec tamen aspiciens oculos habet, aut quibus audit Possidet auriculas, est totus lumen, et auris Totus: ab humano penitus perceptio sensu Abludit divina. Illi mortalia subsunt Omnia, prævalidisque obsistere nescia parent Imperiis ejus contra nihil accidit usquam Aut præter decreta, manus, moderamina: nutu Absque Dei nec musca suas levis explicat alas. Non illum neglectus iners, non perfida Lethe, Non præsumptio vana trahit, nec devius error. Lucis inaccessæ longinquas incolit arces, Quo penetrare nefas, etsi sublimibus esset Ingeniis ea mortalem mysteria captum Excedunt, illuc spectare superbia nobis Stulta, stupor sceleratus erit; pia suscipit illum
Credulitas, qualem descripsimus. Esse, secundo, Angelicos confide choros, cœlestis alumnos Aulæ, syderei comites proceresque tyranni, Participes regni, mandatorumque ministros, Ignaros peccare suique excurrere fines Obsequii, quod nec flagrans remoratur edendi Cura, nec importuna sitis, nec prolis habendæ Impatiens studium distractos occupat; illis Non gula, non venter, non est distinctio sexus; Non Ceres est, non bis genitus, non filia spuma Cordi, indigna suo contemnunt numina cultu. Quilibet officio vigil excubat; atria servant Flammantis stellata poli; subsellia cingunt Augusto substrata throno, despectibus alti Verticis intenti, quo designante parati Cæruleas pennis findunt velocibus auras, Et peragunt opera sublimia jussa fideli. Non situs est idem cunctis, non omnibus unum Officium; perstant erecto corpore quidam (Corpus enim si credis habent) discumbitur illis Mollius, inflexis genubus reverenter adorant, Et figunt alii cœlestibus oscula stratis. Hic laudes celebrans placidi concentibus oris, Aut agili volucres pertentans pollice chordas Carmine mirifico totum demulcet Olympum, Et superas grato modulamine personat aures. Ille polo non invitus delabitur exul, Nube coruscantes humeros indutus opaca, Præfectus custosque datus mortalibus; oras Perlustrat sibi commissas; bona, prava recenset Facta, fovet donis meritos, pœnisque cöercet; Sustinet auxilio labentes, erigit ipso
Prolapsos, levat oppressos, succurrit egenis ;
Eludit technas exquisitique labores
Consilii, minimo digiti conamina flexu
Subruit immodicas vires jactantia; cursus Humanos tenui sufflaminat objice; forma Conspicuus nulli, et radians caput obrutus umbra Apparet liquidis effectibus. Omnibus ingens
« AnteriorContinuar » |