Amplexu, patulo manicarum emissa meatu, Orbe recollecto risit, dictaque salute In superas alacris remeavit Cynthia sedes; Non ita Dictæi stimulo pastoris acuto Inflammavit amor Phoeben, cum languida cœlo Decideret, placitæque infigeret oscula formæ. Interea vos æthereas qui scanditis arces, Ambitiosa mente; poli qui regna patentis Dissita, flammigerosque orbes indagine freti Audacis radii spatiis includitis, astris Cancellos, finesque suos præscribitis ipsi Astrorum Regi; queis stat sententia concors Integros Arabum saltus excedere lunam, Ægyptum licet et Libycas adjungere syrtes; Dicite, quo contracta modo sibi tecta Sabææ Induerit chlamydis, loculique foramine parvo Immensum rutili vultus demerserit aurum : Dicite, quis mendax fuerit, Ptolemæus an ille Sortilegus, gracili vestras qui stringere pugno Auderet stellas, Epicyclos clauderet arca, Nummorumve instar sacco confunderet omnes: Væ vestris, illi si creditur, esto trigonis, Quadrisque, et refugo ductis in pulvere gyris; Prospicite astrologi, et vestras defendite curas. Interea, quintus musæ conamen anhelæ Provocat articulus, summique ferociter instat Judicii terrore minax: nisi credis, acerbas Promittit tibi vindicias, præsagaque monstra, Divino sapiens Mahomet quæ prodidit ore Summum præcessura diem. Seductor Averno Impius emerget, polluto semine, Christo Oppositus nebulo, Graiis cluet Antichristus, Deggiali Turcis; cœcas innectere fraudes, Et pravo sataget pervertere dogmate mundum, Se caput ostentans, præceptoremque salutis. Quem simul aspiciet fulgenti desuper axe Terris grassantem et virus lethale serentem, Indomita pectus generosum percitus ira, Non impune meum numen contemnet alastor
Tartareus, populosque meos abducet inultus, Dicet, et illustri solio delapsus Iësus Cominus aggressu furiosum proteret hostem, Inficiet piceo rorantes sanguine terras; Invectusque triumphali per subdita curru Regna ferus victor spoliisque ornatus opimis Incedet, plausu comitum stipatus ovante. Interea viridi Saracenus origine Muhdi Nascetur (sic lingua virum cognomine signat Barbara, Director Latiis sonat auribus), illum Conveniens Christus, fida solennia dextra Fœdera conjunget, pulchræque cupidine gnatæ Accensus dicet socerum; felice jugales Protinus ardebunt tedæ fulgore, vocatus Faustus Hymen aderit, thalamisque recepta superbis Nympha decens magno peraget solatia sponso. Dum denos quater evolvet Titania lampas Tramitis obliqui reditus, regnare videbit Per terras omnes quam nunc describimus unam Assertore fidem Christo, Christoque probatam Judice; sic levis antiquæ dictamina legis Deseret, eque suis desciscet transfuga castris, Doctior effectus: credat Saracenus Apella Non ego; pulchra licet prono commenta favore Credulus arripiam, quibus illustrissima clarum Dant argumentum Gog Magog nomina: mures Rugosa sileat galeatos casside crustæ, Et bellatrices ranas nugator Homerus ; Pygmeosque truces inter quos tristibus iris Sanguineosque grues exarsit nobile bellum : Corpore debilius, sed stragi fortius agmen Finibus extremis Scythiæ, solisque cubili Nascentis, cæcis in apricum reptile claustris Prodibit Gog, et Magog; gens nana minorque Formicis, gravis est minimum queis sarcina granum, Millia Galfridi comprendit quinque patenti Calceus hospitio, populisque palatia cedet Ampla giganteis, vastamque colentibus urbem. Qui simul innumeris dorsum terrestre catervis
Oppressere, avido cunctasque voragine fontes Absorpsere lacusque; et maxima dulcibus undis Flumina detexere cavos exhausta canales; Enecuitque homines tristi sitis arida flamma, Hæredes vacui traducent secula mundi: Ingens parva stupor percellat pectora, prisci Sydereas arces monumenta tuentibus ævi. Tunc oblita sui cursus natura, soluto Ordine, primævæ violabit fœdera legis; Errabunt omnes stellæ; sibi dispar Apollo Ducet in eois nocturna silentia plagis, Hesperiisque diem revehet præposterus oris : Impatiens salsa putrebit squamiger undæ ; Infecto volucres languentibus aëre pennis Præcipiti lapsu devolventur: fera saltus Nulla venenatos, nec inhospita lustra subibit. Strata cadaveribus moestissima scena ruinæ Continuo tellus celebrabit funera luctu: Cuncta repentino occumbent animalia fato. Sedibus avulsos montes violentus avitis Impetus æthereos adiget conscendere campos. Sublimi dubium carpent iter astra volatu Inter, et occursu committent prælia duro ; Sphærarum moles subitis adamantia flammis Corripietur, et in fluidum diffusa liquorem Migrabit; cum feralis desæviet ardor Sopitaque refrigescet cœleste metallum Sulphuris ignivomi cholera vehemente, recentes Cudentur cœli; renovatis purior axis Fulgebit radiis; redivivi candida Phœbi Frons arridebit, macularum sordida nulla Fæce, nec umbrosæ disparens objice nubis. Nos quoque morte resurgemus, Lethesque sopore Discusso, nudi, quales emersimus alvi Maternæ latebris peregrina luce recepti. Sed præclara pios, doctores atque prophetas Involvet vestis, demissaque purpura cœlo Nobilis, Hulet habet nomen: jumentaque Burak Inflammata jubas radiis labentur ab alto;
Ignibus aurigam qualis circundata Phœbum, Et Phaëtonteos post se rapit ungula currus. Has induta togas, atque hos conscensa caballos, Gens proba migrabit superi sub tegmen opacum Lætificasque umbras solii, placidaque fruentur Tranquilla mentis requie: pars altera nudis Expositi membris Boream frigusque severum, Torrentisque feros cruciatus sentiet æstus ; Affligent inopes stomachos jejunia macra, Parcaque pallentes tenuabunt pabula vultus ; Visceribus vacuis insanus sæviet ardor, Non gelido prohibendus aquæ non aëris haustu. Innixi pedibus stabunt; sedilia nulla Restituent artus jugi languore solutos; Palpanti tremulæ salient formidine venæ, Emissusque pavor stupefacti fonte gelato Cordis sudores rigida cute, stercus ab alvo Excutiet, laxisque invitas renibus undas. Mox versus superos ignes, solisque caminum Ardentem plantis gradientur inermibus auras Calcantes; Nemesis flagris crepitantibus instans Urgebit tardos, lapidis distantia donec Discretos tenet unius, præcordia Phobi
Ne subeant, liquidæque natent in gurgite flammæ. Bulliet in venis insueta febre laborans
Sanguis; fusus adeps; caro colliquefacta; medullæ In rorem undosum maceratæ; durior ossis Compages domita in viscum lentumque madorem Rara pelle colabuntur; circumfluus humor Proluet innantes sibimet, pinguedine coctos Nativa, inque sui demersos balnea succi. Hos vada sudoris tenui manantia lambunt Alveolo, talis genubusque coërcita summis; Illos ad renes evectior amnis inundat;
Sunt quibus ad collum turget liquor, et caput extans Gurgite contiguum despectat; sunt quibus ora
Insugunt salsos latices; sors ultima genti
Contingit miseræ, capitis cui vertice summo Pendulus alluitur fluctu insultante capillus. BARROW, VOL. VIII.
Hoc angore fatigati, dum secula centum Quinque teret vicibus fatali pollice textrix Clotho, spe tremula summi decreta manebunt Judicii, meritis exactæ congrua vitæ. Momentis librata bilanx aptabitur æquis, Qua bona cum pravis collato pondere facta Certabunt nisu adverso; queis prægravis ansam Alliciet virtus libræ in devexa sequacis, Elysii virides lucos sedesque beatas
Intrabunt; quibus evincent sequiora, subibunt Inferni tristes umbras Stygiamque paludem: Ni facilis Deus eximiæ bonitatis amico Impulsu, sancti vel præpellente subactus Supplicis oratu parcat, duræque remittat Arbitrium legis; tum ferrea vincula collo Captivo resoluta cadent; suffusa pudore Ultrix pœna retro cedet, victrixque triumphos Solennes toto ducet clementia cœlo.
Ast cui vera fides morienti defuit, extra Ritum sincerum, et puri commercia cœtus, Nulla precum misero vehementia proderit iræ Devoto, nec flectet inexorabile fatum. Cui fortuna favens genuino lumine mentem Perfundi donavit, et expirare fidelis Intra septa gregis, licet indulgentia nulla, Intercessio nulla fuit, quæ pondere pressum Peccati gravis immodico defendat acerbis Suppliciis, animamque addictam subtrahat Orco; Post exacta suis delictis debita justi Tempora tormenti, laxato carcere liber
Prorepet, passuque alacri conscendet Olympum : Postera præteritæ geminabunt gaudia curæ. Consulet oppressis vindex Deus; arbiter omnis Abscedet, peraget propriis examen ocellis : Exiget a sævis rigidissima justa tyrannis; Si quicquam fecere boni mercede rependi Deposcens, si doctrinam coluisse prophetæ, Cultum promovisse sacrum, donaria templis Impendisse, scholas studiis struxisse fovendis,
« AnteriorContinuar » |